BUKIT LUGAS, TAMBUNAN

Laluan ke puncak pertama

Yeahh...finally...sampai juga di Bukit Lugas. Tempat yang menjadi popular bagi diurang yang ndak takut sama ketinggian. Simpang mo pigi di Bukit Lugas ni adalah simpang pertama sebla kiri lepas simpang Jalan Tumpason kalu kamurang dari Tambunan mo pigi Keningau.

Parking kerita kamurang bagus2 di siring2 jalan, jangan sampai membahayakan kerita urang len atau kerita kamurang sendiri sebab tu simpang ada dekat2 jalan utama Tambunan-Keningau.

Untuk sampai pigi di puncak, kamurang kena hiking siiiiikit dalam 120 meter sebelum kamurang jumpa tu trail di sebla kanan sejauh lebih kurang dalam 100 meter ke starting point.

Puncak Pertama

Ok, sampai di starting point, kena make sure urang yang di atas tu ndak ramai sebelum kamu start mendaki sikit untuk sampai di atas. Jalan tu ada curam sikit tapi sinang mo nek la, ada juga bei tali sana kana kasi ikat.

Sampai di atas, kena pastikan yang pendaki lain sudah turun atau sikit sebab sempit dan buli membahayakan keselamatan kamurang dan urang len. Kalu buli, lepas satu grup turun baru la kamu start pi puncak pertama.

Bagi urang yang berani atau ndak takut sama tu ketinggian, buli la slow2 jalan pigi puncak utama sejauh 50-70 meter tapi make sure jangan kamurang men2 la sebab one mistake, you will be 30-40feet down below.

Kalu sudah sampai, bah selfie wefie la kamurang tapi jangan lama2 sebab urang len pun mo pi sana juga.

Bila turun dari Bukit Lugas, tulung la jangan buang2 sampah macam botol2 mineral water atau bungkusan bun. Bikin malu hikers kalu ndak tau buang sampah dengan cara yang betul. Bawa balik sampah kamurang, tu tampat bukan bapa mama kamu punya tu.

Apa2 pun, selamat mendaki buat kamurang somua. Siurang sampai puncak pertama pastu turun, ndak sanggup bagi risiko diri yang comel ni pigi puncak kedua. hahaha

Pandangan dari puncak kedua ke puncak pertama